<p>Бугун Шовот туман ахборот-кутубхона марказига 24-умумий ўрта таълим мактаби ўқувчилари ташриф буюришди. Ушбу ташриф ўқувчиларнинг китобхонлик маданиятини ошириш, уларнинг билим доирасини кенгайтириш ҳамда бўш вақтларини мазмунли ташкил этиш мақсадида ташкил этилди.</p> <p>Ташриф давомида ўқувчилар ахборот-кутубхона марказининг фаолияти, фондида мавжуд бўлган адабиётлар, жумладан, янги келиб тушган бадиий, илмий-оммабоп ва соҳавий китоблар билан яқиндан таништирилди. Мутахассислар томонидан ҳар бир бўлим ҳақида батафсил маълумот берилиб, китоблардан тўғри ва самарали фойдаланиш қоидалари тушунтирилди. Ўқувчилар ўзларини қизиқтирган мавзулардаги адабиётлар билан танишиб, саволларига атрофлича жавоб олишди.</p> <p>Шунингдек, ташриф доирасида ўқувчилар ўлкашунослик музейига ҳам олиб борилди. Музейда Шовот тумани тарихи, қадимий маданияти, миллий урф-одатлари ҳамда машҳур шахслар ҳаёти ва фаолиятига оид ноёб экспонатлар намойиш этилди. Ўқувчилар тарихий буюмлар, қадимий ҳужжатлар, суратлар ва бошқа кўргазмали воситалар орқали ўз юртининг бой ўтмиши ҳақида қизиқарли маълумотларга эга бўлишди. Бу эса уларда ватанпарварлик туйғуларини янада мустаҳкамлашга хизмат қилди.</p> <p>Ташриф якунида ўқувчилар ахборот-кутубхона марказида яратилган шароитлар, бой китоб фонди ва музей экспозицияларидан катта таассурот олганликларини билдиришди. Бундай тадбирлар ёш авлодни китобга ошно этиш, уларнинг тарихий хотирасини мустаҳкамлаш ва маънавий дунёсини бойитишда муҳим аҳамият касб этади.</p>